أمثال مغربية فلاحية

يناير:
يناير قتال الخماير.
ولد الناير لا حطبة لاشطبة لازيت لاخمايـر.
سَعْدْ الذَّابَح لا وُجُوه تَتْشَابَه لا كْلابْ تَتْنَابحْ.
في البَوْلَع كُولْ وَبْلَع.
سعد البولع السما تسقي والارض تبلع.
في بولع الكرش ما تشبع والنار ما تصبح والكلب ما ينبح.
سعد البولع ، وكلو مايشبع كلمو مايسمع.
فبراير:
شهر فبراير يخلي شعر المعز كيتطاير على كل ظهاير.
فبراير صباب الماء بالغراير.
يبراير الضحّاك،مرة شرقة مرة برقة.
سَعْد السّْعُود تْخْرَج فِيه الحَيَّة و الڮَنْفُود وَ تْزَنْزَنْ النَّحْلَة في العُودْ .
سعد السعود كتخرج الحية والقنفود و كيطلع الماء فكل عود.
سعد السعود كتكز النحلة فالعود.
في الخبْيَة تُخْرج كل منْ هي مْخَفْيَة.
إلى دخل سعد الخبية تفرح البنت واللبية.
سعد الأخبية مجمد الماء فالخابية.
إِيلاطْلَعْ المَشْبُوحْ مع المغرب لُوحْ المحراث و اهْرُبْ.
ايلا خرجات الليالي انقش الفول أو زيد حتى الدوالي.
خروج الليالي نعايم ،و خروج الصمايم نقايم.
حرث الليالي كي الاول(البكري) كي التالي(المازوزي).
إلى خرجت الليالي ،لا تشري ثوب غالي.
إِلى صَبَّاتْ اللْيالي نْتَفْ زَغَبْ راسك و دِيرُو دْوَالِي.
مارس:
مارس مسلخ البقر من الراس وخى يكونو ملاسو، وكيخلي كل عشبة براس.
إِيلا لْقَاهَا غْبَارْ يْرُدّْهَا نَوَّارْ وَيْلاَ لْقَاهَا نَوَّارْ يْزيدْها نَوَّارْ فِي نَوَّارْ.
مارس بياض الفلالس.
الرعد دمارس إما فالنسا أو فالبهايم.
سبع ديال السحايق فالعام كامل، وسبعة فمارس بوحدو.
قال مارس:الى احضرت أنا غيبوا كاملين ،والى غبت أنا حضروا كاملين .
إلى كان مارس يسيل وأبريل ظليل، ومايو صافي صقيل، الثلث فالصابة يحيل عند الخمّاس الذليل.
فاتك الغرس قبل مارس، والزريعة قبل حيان (أيام الحسوم).
لا تعْزَلْ جْدْيَك من الجْدْيَانْ حْتَى تْفُوتْ اللْيَالِي حَيَّانْ (أيام الحسوم).
اللْيالي حيان تْخَلِّي السّْبُولَة فِي الفَدَّانْ.
إلى رْوات فبطن الحوت، وخى يصوط النطح بالحانوت(الرابوز).
بَطْن الحوتْ الْمَا ولآّ نْمُوتْ.
بين السبولة والفولة كيموت ولد المهبولة
أبريل:
يبريل الضليل مرة شرقة مرة برقة،حتى طرطق الورقة.
برد يبرير يرعد الخنزير.
في النّْطَاحَات تَيْتْقَادُّوا الشّْطَاحَاتْ.
يَبْطَنْ ولاَّ يبْطَلْ.
إلى ما كانت الشتا د نيسان، يكونو نيابي كد الفيسان، وعَيْنِي كد الكيسان.
ماي:
منين كيدخل مايو، كل يتيم يعمل بْرَيو.
اللي خلع فمايو، تلف الله ريه.
فمايو هاتو المناجل وهايو .
إلى كان مايو صافي صقيل الثلث فالصابا يحيل.
إلى دخل مايو حصدو وخى يكون فلايو.
إلى صبت الشتا ف ماي غي حرث وڴول ها الكبال جاي.
الثّْرَيَا تصيبْ المَطّْ علَى كُل ثْنِيَة ولاَّ تْصِيبْ النّْوَادَرْ مَبْنِيَة ولاَّ كُلْ فَدَّانْ تْزِيدْ فِيه ڮُلِيَة.
فِي الدَّبَرانْ قْطَعْ لا تْدَبَّرْ.
اترك حرف الرا وبات برا(يعني يمكن النوم في الخارج).
في الهَقْعَة تَيْمُوتْ مُولْ الفَدَّانْ بِالفَڮْعَة(تيبس جميع الحقول)
برد الصيف امضى من السيف.
غشت:
غشت،غشت طياب الكرموسة من الوسط.
غشت أولو تين وآخرو طين.
إلى تكلَّم الرعد فالسمايم، دير راس مالك بهايم.
إلى جا الرعد فالسمايم المرض إما فالنسا او فالبهايم.
إلى بانت الكرموسة بانت الغيسة.
شتنبر:
في شْتَنْبير يْتْزَادْ الماء في قَاع البِيـر.
برد الخريف يهلك القوي أو الضعيف.
الشتا ديال الخريف ما تجيب ضيف.
إلى ولات ورقة الكرم قد ودينات الفار تيتساوى الليل مع النهار.
نونبر:
اللِّي بْغَا قمح العَوْلة يْحَرْثُو في الشَّوْلَة.
إِيلا طْلَعْ المَشْبُوحْ مْعَ لَعْشَا لُوحْ الزرع بِالكَمْشَة و قُولْ لْعَامْ مْشَى يَا ولْدْ العَمْشَة" (المشبوح ثلاثة نجوم براقة مصطفة في خط عمودي).
الحرث بلا غبار بحال الغايب بلا خبار.
لا تزرع في هذا الوقت الا الشعير خوفا على القمح من العصافير.
دجنبر:
بَرْدْ البَلْدَة يُوصَلْ حْتَى للْكَبْدَة
البلدة كترد العروسة قردة والعجوزة جلدة.
إلى طلعات الشمس حمرا مع الصباح، ربط حميرك وارتاح. وإلى بانت حمرا فلعشية،حلس حميرك وتوجد للمشية.